Vücûd bir binâ durur sırr-ı hikmet içinde Gönül bir bünyâd durur nakd ol bünyâd içinde

1Vücûd bir binâ durur sırr-ı hikmet içinde Gönül bir bünyâd durur nakd ol bünyâd içinde

2Gönül sultân hâkim cân cümle iş ana kurbân Dil dahı bir tercemân yürür kudret içinde

3Gönül oturur tahta hükm ider Kâf'dan Kâf'a Nefis durmış ırakda meyli ‘işret içinde

4Ol nefs kim câna uyar ma‘nîden sanma duyar Her dem ana uymayan bil ‘inâyet içinde

5Evvel kapu şerî‘at geçse andan tarîkat Gönül evi ma‘rifet ‘ışk hakîkat içinde

6Şerî‘at şîrîn olur işidene hoş gelür Ne kim dilerse kılur ol şerî‘at içinde

7Tarîkat cân yoldaşı cân ile olur işi Tarîka giren kişi dün-gün ‘ibret içinde

8Ma‘rifet gönül ile dün ü gün zârıyıla Söylesem gelmez dile sırr-ı sıfat içinde

9Hakîkat ‘ışkdur ‘ıyân görsün ol şebih beyân Hakîkat donın geyen agır hil'at içinde

10Şerî'at sûret evi tâ‘ate girer kavî ‘Âleme çıkdı çavı ‘ubûdiyyet içinde

11Tarîkat câna gelür tâ‘atına cân kılur Girmeyen ziyân kılur iş bu devlet içinde

12Hakîkate irenler hakîkati bulanlar Ne bahtludur cânları hep mahabbet içinde

13Her kim şerî‘at bile hem okıya hem kıla Ol gerek kim er ola dün-gün tâ‘at içinde

14Ger tâ‘at kılmazısa üstâda varmazısa Şer‘iden olmazısa adı la‘net içinde

15Şerî‘at ana eydür ana ‘abes ol addur Anun makâmı oddur şol âhiret içinde

16Her kim tarîka gire gerek mâl terkin ura Yola togrı cân vire bu tarîkat içinde

17Ger togrı turmazısa mâl terkin urmazısa Yola cân virmezise tuymaz sohbet içinde

18Tarîkat anun degül ol kılmış yolın melûl Hak kılmaz anı kabûl bulmaz rahmet içinde

19Ger bahrî olmazısa denize dalmazısa Seyrânun bilmezise yokdur kıymet içinde

20Ma'rifet gönül şehri makâmun bulur fakrı Bahrî gerekdür bahrî bu ma‘rifet içinde

21Ma'rifet andan ırak anun degüldür durak İşi olsa da yavlak anun bu ad içinde

22Her kim hakîkat süre kahrı lutfı bir göre İş aça togrı dura bu hakîkat içinde

23Ger togrı turmazısa yolına irmezise Kahrı hoş görmezise adı yok ad içinde

24Anun degül hakîkat ol devlet ol nasîhat Evvel âhir ‘âkıbet bulınca mât içinde

25Bu dört menzildür utan ledün makâmun tutan Oldur menzile yiten tamâm murâd içinde

26Ol menzile yitenün dört nişânı var anun Ol nişânı kılanun yiri rahmet içinde

27Sûretün halka düze Hakk'un yolında ize Çıka seyir eyleye ol semâvât içinde

28Tevekkül işi ola kanâ‘at aşı ola ‘İnâyet başı ola nûr-ı rahmet içinde

29Kıyl u kâle mecâl yok ol hâldür ana kâl yok Hergiz ana ecel yok ezel-ebed içinde

30İşdür bunca âvâzlar didügüm ma‘nî sözler Tapduk Yûnus'ı gözler bu vilâyet içinde Şiir Muahhar Mecmûalarda Mevcuttur.