Hak’ın ol künh-i zâtından olupdur enbiyâ peydâ Nebîler nûru varından olupdur evliyâ peydâ

1Hak’ın ol künh-i zâtından olupdur enbiyâ peydâ Nebîler nûru varından olupdur evliyâ peydâ

2Velâyet ilmi sırrından hitâb eyler sana cânım Evliyâ nûr-ı varından edipdir âşıkı peydâ

3Hakîkat bilmeyen kimse dekâyık n’idiğin bilmez Âşıkın nûr-ı varından edipdir zâhidi peydâ

4Muvahhid olmayan kimesne bilmez ehl-i hâl hâlin Zâhidin nûr-ı varından edipdir âbidi peydâ

5Gözünden perdeyi kaldır erişesin bu menzile Âbidin nûr-ı varından edipdir nâsı hep peydâ

6Cemâl-i hüsn-i bâğında akıllar mât u ser-gerdân Bakılmaz kamaşır gözler acâyib mahlukât peydâ

7Dilim söyler benim sana budur ilhâm-ı Rabbânî Sizinçün Cennet-i a‘lâ yaratdı eyledi peydâ

8Ne hikmetdir ne ibretdir dilim söyler bu tevhîdi Gazabının kemâlinden edipdir İblis’i peydâ

9Bu menzil-i merâtibden haber yokdur sana zâhid Bu aşkın taht-gâhında olupdur rûhumuz peydâ

10Benim âşıklar içinde sözüm sebbit ü isbâtdır Bakındı arşın altında bu deryâ-yı muhît peydâ

11Dediler nüsha-i kübrâ ne ma‘nâdır haber ver sen Ne ki var kendüden gayrı yaratdı eyledi peydâ

12Nihân ilmi ayân oldu bu tevhîdin kemâlinden Ademden âdeme geldi olupdur cümleden peydâ

13Usûlü gel haber ver sen Vehâb-ı derdmend miskîn Ne tutulur ne görülür esen yellerinden peydâ