Yâ ilâhî ger su'âl itsen bana Bu durur anda cevâbum uş sana

1Yâ ilâhî ger su'âl itsen bana Bu durur anda cevâbum uş sana

2Ben bana zulm eyledüm itdüm günâh N'eyledüm n'itdüm sana iy pâdişâh

3Gelmedin didün hakuma kem diyü Togmadın didün ‘âsî Âdem diyü

4Sen ezelde beni ‘âsî yazasın Toldurasın ‘âleme âvâzesin

5Her ne dilersen hakumda işledün Ne tuşa durdumısa sen tuşladun

6Ben mi düzdüm beni sen düzdün beni Pür ‘ayıb niçün yaratdun yâ Ganî

7Gözüm açup gördügüm zindân içi Nefs ü hevâ pür-tolu şeytân içi

8Habs içinde ölmeyeyin diyü aç Mismil ü murdâr yidüm bir iki kaç

9Nesne mi eksildi mülkünden senün Yâ sözüm geçdi mi hükmünden senün

10Rızkun alup seni muhtâc mı kodum Yâ öyünün yiyüben aç mı kodum

11Kıl gibi köpri yaparsın geç diyü Geçüben kevser şarâbın iç diyü

12Kıl gibi Sırât'dan Âdem mi geçer Yâ üzilür yâ tayanur ya uçar

13Yine fazlundur kulunı geçüren Geçüben kevser şarâbın içüren

14Kullarun köpri yaparlar hayr içün Hayrı oldur kim geçerler seyr içün

15Pes gerek kim anda muhkem ola ol Kim görenler diyeler uş togrı yol

16Terezü kurdun günâhum tartmaga Kasd idersin beni oda atmaga

17Terâzû ana gerek bakkâl ola Ya bazirgân tâcir ü ‘attâr ola

18Çün günâh murdârlarun murdârıdur Hazretünde yaramazlar kârıdur

19Pes niçün murdârı açup tartasın Sen gerek lutfıla anı örtesin

20Şimdi dirsin seni oda urayım Şerri bir denk artugısa göreyim

21Şerri azatmak gerekdür hayrı çok Hayrı olmayanlar oldı anda yok

22Sen basîrsin hod bilürsin hâlümi Pes ne hâcet tartasın a‘mâlümi

23Haşâli'l-lâh senden iy Rabbü'l-enâm Sen temâşâ kılasın ben hoş yanam

24Geçmedi mi intikâmun öldürüp Çüridüp gözüme toprak toldurup

25Bir avuç topraga bunca kıyl u kâl Neye gerek iy Kerîm-i Zü'l-Celâl

26Kara kıldan çün ki agardı ak kıl Bu cihân sevdâların elden kogıl

27Çün Yûnus'dan gelmedi hergiz ziyân Sen bilürsin âşikâre vü nihân

28Olmasun bizden sana ayruk cevâb Söz budur va'llahü a‘lem bi's-sevâb