Biz uludan işitdük evvel er yaratıldı Pâdişâhun birligin evvel kadîm er bildi

1Biz uludan işitdük evvel er yaratıldı Pâdişâhun birligin evvel kadîm er bildi

2Bunca yıl bunca zamân biz işitdük bî-gümân Çalap kendü sun‘ından ere Tanrılık kıldı

3Eydürler bir kuşıdı hikmeti öküşidi İki cihân ‘ârifi ol kuşdan ‘ibret aldı

4Ol kuşun her bir yöni yüz bin yigirmi dört bin Evvel ol kuş uçuban rahmet göline taldı

5Çün gölden girü döndi budak üzere kondı Silkindi her bir yönden bir tamla su döküldi

6Ol suyun her birisin bir cân yaratdı güzin Ol cânun her birisi bunda peygamber oldı

7Evvelki bünyâd oldı altı kez dünyâ toldı Yidincisi buyıdı bu Âdem yaratıldı

8Âdem toprakdanıdı ‘Azâzîl oddanıdı İşitdük ‘Azâzîl'i Âdem'e bakdı güldi

9Secde geldi Âdem'e eydür inün kademe Cümle firişte indi ‘Azâzîl dura kaldı

10Eydür ben oddan olam yüz bin yıl tâ‘at kılam Tapu buyuracagın tâ‘atın ‘arza kıldı

11Ol halkun varlıgından pâdişâh birliginden Şol bir söz sebebinden sürildi la‘net oldı

12Her kim kendüyi gördi üstâdı İblîs oldı Kişi ne buldıyısa miskînligile buldı

13Eksikligüm Hak bilür ‘ışkı bana ol virür Kılgıl Yûnus'a tîmâr ‘ışk beni benden aldı