Ben dost içün aglarısam gözüm yaşını kim sile Yaşum niçe dine benüm böyle ‘acâyib derdile

1Ben dost içün aglarısam gözüm yaşını kim sile Yaşum niçe dine benüm böyle ‘acâyib derdile

2İy yârânlar gelün berü anladayum ahvâlümi Hîç kimsene ola mı kim bu derdüme dermân kıla

3Cümle ‘âlem gelürise ansuz dermân olmayısar Derdüme kim dermân olur çün gönlümde ol sevile

4Ölüp sine girürisem etüm-tenüm çürimeye Anun içün kim dünyeden ben giderem sevmegile

5Yârenlerüm eydür bana ayrık anı görmeyevüz Fürkâte düşdi sûretüm bir menzilden bir menzile

6Bir gözi yaşlu ‘ârife ugradum eydür aglagıl Bunda çok aglayan kişi anda gider güle güle

7‘İlm-i sâbıkdan ilerü dahı Elest belürmedin Ben ol idüm ol ben idi şimdi niçesi kesile

8Ol kıyâmet bâzârında her bir kula baş kayusı Ne kayursın anı seven çün ol ‘arasâtda bile

9Ol dostıla benüm işüm ölüp dahı bitmeyiser Bu niçe ola kim bite çün gönülde dost sevile

10İsrâfîl sûrı urıcak her bir sûret nefsüm diye Ben anmayam hîç Yûnus'ı Tapduk gele ol dem dile