tarikat.org1Sûretden gel sıfata yolda safâ bulasın Hayâllerde kalmagıl yoldan mahrûm kalasın
2Bu yolda ‘acâib çok sen ‘acâib anlama ‘Acâib anda ola dost yüzini göresin
3‘Işk kuşagın kuşangıl dostun yolını vargıl Mücâhede çekersen müşâhade idesin
4Bundan ‘ışkun şehrine üç yüz deniz geçerler Üç yüz deniz geçüben yidi Tamu bulasın
5Yidi Tamu'da yangıl her birinde kül olgıl Vücûdun anda kogıl ayruk vücûd bulasın
6Hakîkatdür Hak şârı yididür kapuları Dergâhında yüz dürlü gerek kudret göresin
7Evvelki kapusında bir kişi durur anda Sana eydür teslîm ol gel miskînlik bulasın
8İkinci kapusında iki arslan vardur anda Niçeleri korkutmış olmasın kim korkasın
9Üçüncü kapusında üç evren vardur anda Sana hamle iderler olmasun kim dönesin
10Dördünci kapusında dört pîrler vardur anda Bu söz sana rumûzdur gör kim delîl bulasın
11Beşinci kapusında biş ruhbân vardur anda Dürlü metâ‘lar satar olmasun kim alasın
12Altıncı kapusında bir Hûr oturur anda Sana eydür gel berü olmasun kim varasın
13Çün kim anda varasın ol Hûrîyi alasın Bir vâyeden ötürü yoldan mahrûm kalasın
14Yidinci kapusında yidiler otrur anda Sana kurtuldun dirler gir dost yüzin göresin
15Çün içerü giresin dost yüzini göresin Ene'l-Hak şerbetini dost elinden içesin
16Şu didügüm keleci vücûddan taşra degül Tefekkür kılurısan cümle sende bulasın
17Yûnus işbu sözleri Hak varlıgından eydür İsterisen kânını miskînlerde bulasın