tarikat.org1Bu fenâ mülkinde ben niçe niçe hayrân olam Niçe bir handân olan yâ niçe bir giryân olam
2Geh feleklerde meleklerden dilekler eyleyem Gâhı ‘Arş' u şems ile gerdün olam gerdân olam
3Adımum atdum yidi dört on sekiz binden öte Tokuzı yolda koyup şâh emrine fermân olam
4Dost ferâh kıldı terâhdan ben teberrâ eyledüm Sûretâ insân olam hem cân u hem cânân olam
5Gâh bir müftî müderris gâh mümeyyiz gâh temiz Gâh müdebbir nâkıs u geh naksıla noksân olam
6Gah batn-ı Hût içinde Yûnus'ıla söyleşem Geh çıkam ‘Arş üzere bir cân olam Selmân olam
7Gâh inem esfellere şeytânıla şerler düzem Geh çıkam ‘Arş üstine seyrân olam cevlân olam
8Geh varup bir sır olam hem işidem hem söyleyem Bir cüvân olup gehi insân olam nisyân olam
9Gâh ma‘kûlât u meşrû‘ât u takrîr ü beyân Gâhi maksûrât olam gâh sâhib-i keyvân olam
10Niçe bir sûretde insân ü sıfatda cânavâr Niçe bir dilkü olam yâ kurd u yâ arslan olam
11Niçe bir tecrîd ü tefrîd ü mücerred-münferid Niçe bir cinnî vü insî yâ niçe şeytân olam
12Niçe bir ‘ışk meydânında nefs atın segirtdürem Yâ niçe bir başumı top eyleyüp çevgân olam
13Birligile bir olam birlik benümle bir ola Geh dönem deryâ olam katre olam ‘ummân olam
14Gâh duzahda yanam Firavn'ıla Hâmân'ıla Gâh Cennet'de varam Gılmân'ıla Rıdvân olam
15Gâh bir gâzî olam Efreng'ile ceng eyleyem Geh dönem Efreng olam nisyânıla isyân olam
16Gâh bir mechûl olam merdûd olam Nemrûd olam Geh varam Ca'fer olam Tayyâr olam perrân olam
17Gâh bir nâmî olam ‘ilmile kâm ıssı olam Cehlile geh yüriyem nâ-kâm olam nâdân olam
18Geh yıkam gâhî yakam yir yüzini perrân idem Geh varam ‘Arş'a çıkam hem şâh olam sultân olam
19Degmeler bu sırra irmezler ledünnîdür ‘azîz Hızr'ı koyup yolda ben kerrûbıla gerdân olam
20Niçe bir derdler ile odlara yanam yakılam Niçe bir şâkir olam zâkir olam mihmân olam
21Yâ niçe bir dostıla ol ben olam ben ol olam Yâ niçe ırak düşem mahzûn olam ahzân olam
22Terk idem nârıla hâki bâdı nârı aslına Şeş cihetde ben çıkam bî-ten olam bî-cân olam
23Niçe bir Cercîs ü Bercîs olam u Mirrîh olam Niçe bir Câlinûs u Bukrât olam Lokmân olam
24Bu tokuz arslan u yidi evren ü dört ejdehâ Bunlarunla ceng idem Rüstem olam destân olam
25Bir demî âsûde bir dem gafletile hurd u hâm Bir demî âşüfte olam Mecnûn olam hayrân olam
26Gönlümün gencine rencler irmedin bir yol bulam Yâ Hû deryâya girem bî-reng ü bî-elvân olam
27Cânile ‘ârif olup senlik ü benlik terk idem Geh varup dilsüz olam ögsüz olam hayvân olam
28Çün di dirler n'ideyin dimezse yanar cân u ten Ben dahı dürler dökem dosta hezâr destân olam
29Kâr olam bî-kâr olam ‘âriflere esrâr olam Geh dönem gerdân olam güftâr olam Nu‘mân olam
30Geh varam balçık olam geh dönüben gird-i hâk Geh varam gevher olam yâkût olam mercân olam
31Âdemîlikden çıkam uçam melekler mülkine Levn olam bî-levn olam geh kevn olam bî-kân olam
32Geh mutî' olam Hudâ'nun emrine bin cân ile Geh dönem ‘âsî olam Mûsî olam ‘İmrân olam
33Geh varam Dâvud olam çıkam Süleymân tahtına Geh gine güm-râh olup vaslı koyup hicrân olam
34Gâh zindândan çıkam âzâd olam âbâd olam Geh gine derbân olam mahbûs olam zindân olam
35Dâr olam girdâr olam ber-dâr olam Mansûr olam Cân olam hem ten olam hem în olam hem ân olam
36Geh beyâbân (u) harâb u geh serâb u geh türâb Geh gine ma‘mûr olam geh çetr ü geh sayvân olam
37Gâh ‘izzetle varup mü'mîn olam devletlü ben Geh varam rükkân olam rehber olam ruhbân olam
38Geh dönem hâmûş olam geh cûş idem geh hûş olam Geh dönüp pür-rengilen hem bâg u hem bostân olam
39Gâh varam bir sâz olam bir söz olam pür-sûz olam Geh varam imkân olam îmân olam ihsân olam
40Dem olam Âdem olam ‘âlem olam ‘âlemde ben Dem olam bî-dem olam hem nâm olam hem nân olam
41Yûnus'a Tapdug u Saltug u Barak'dandur nasîb Çün gönülden cûş kıldı ben niçe pinhân alam
42Yûnus imdi bu sözi sen ‘âşıka di ‘âşıka Kim sana ben sıdk olam hem derd ü hem dermân olam
43Gâh hâlis ü gâh muhlis olam uş Furkân'ıla Gâh Rahmâni'r-Rahîm yâ Hayy u yâ Mennân olam
44Geh dönem bir şems olam zerremde yüz bin ‘Arş ola Geh yine tugyân olam ‘âlemlere tûfân olam
45Evveli Hû âhiri Hû yâ Hû illâ Hû olam Evvel âhir ol kala vü men aleyhâ fân olam