Ezelî bu ‘ışkı ben bu mülke sürüp geldüm Biridüm anda şeksüz uş yine bire geldüm

1Ezelî bu ‘ışkı ben bu mülke sürüp geldüm Biridüm anda şeksüz uş yine bire geldüm

2Ol birün nûrı bana göründi er yüzünden Cân gözile ol nûrı ben bunda sora geldüm

3Ol nûrı göreliden unıtdum kendözümi Sanasın Mûsâ benem hâcete Tûr'a geldüm

4Tûr-ı münâcât bana turdugum yirde olur Benem bugün Bâyezîd uş gizlü sırra geldüm

5Ezel benüm ilümdür Elest benüm yolumdur Ezelile Elest'i ben bunda göre geldüm

6Ben ezelden varıdum ma'şûkıla yârıdum Hak beni viribidi âlemi göre geldüm

7Çün gökden yire yagdum yirden göge çok agdum Âdem tonın tonandum devrânum süre geldüm

8Et ü deri büründüm geldüm size göründüm Adumı âdem kodum andan zuhûra geldüm

9‘Işk esritdi cânumı uş Ene'l-Hak didürür Korku gitdi gönlümden Mansûr'am dâra geldüm

10‘Işkdan dertlü olana dermânum vardur benüm ‘Işk sayrusı olana erkândur sora geldüm

11Mecnûn kadehin aldum Leylî gönline taldum Çün Hakk'ı ‘ıyân bildüm andan sınura geldüm

12Bundan böylesi bilgil pâdişâh iklîmidür Dört yanum dîdâr oldı gör ne hûb yire geldüm

13Bana bu ‘ışk tolalı adum Yûnus olalı ‘Iyân oldı pâdişâh kulam şükrâne geldüm