Derdmend-i ehl-i derdem derde dermân kimdedir Sorduğum ayb olmasın lutf ile ihsân kimdedir

1Derdmend-i ehl-i derdem derde dermân kimdedir Sorduğum ayb olmasın lutf ile ihsân kimdedir

2Gayrıdan hiç olmaya tevhîd-i zât olsun delîl Çıkmayam düşem ebed deryâ-yı ummân kimdedir

3Vechi sırrından haber vere gele hakke’l-yakîn Cânıma Allâh içün âyât-ı Kur’ân kimdedir

4Sormağa âr etmezem ma‘nâ-yı mutlakdır haber Gönlüm âbâd etmeğe vicdân-ı irfân kimdedir

5Nâkes uçmak bulmaz imiş ehl olan versin haber On sekiz bin âlemi levhinde seyrân kimdedir

6Biz ki dervîşiz fakîriz derdmend bî-çâreyiz Taksirât etmen bize den âb-ı hayvân kimdedir

7Sâile ayb değildir her ne olursa istemek Kokusu Hak’dan gelir verd ile reyhân kimdedir

8Mü’minin kalbinde pinhân adı Ahmed’dir anın Gizli değil gün gibi ol nûr-ı ayân kimdedir

9Çağırıp feryâd eder dîzâr içün can bülbülü Açılıp ol gül gibi verd ile handân kimdedir

10Aça ol gönlüm gözünü göstere dîzârını Rûh yüzünden tis‘ayı çalmağa çevgân kimdedir

11Bir aceb kârhânedir kesb eyleyen aldanmadı Oturam gönlünde anın Hakk’a mesken kimdedir

12Vâhid ü Ferd ü Ahad’dan ârife budur nidâ Cânıma ilhâm eden ol nûr-ı Yezdân kimdedir

13Sözümüz hatm eyledik lâzım değil bir söz dahi Aşka hem-râz olmağa cânımda cânân kimdedir

14Tevhidin ma‘nâsına hakka’l-yakîn budur delîl Sâile rahm etmeğe sadrında îmân kimdedir

15Cân ile cânân yüzün gören bilir ahvâlimiz Vâhib’i hayrân eden şevk ile devrân kimdedir

16Maksudumdur isterin sırr-ı maârif gencini Nûr-ı sâfîden anın la‘l ile mercân kimdedir

17Aşk dilinden Vâhibî eyler hitâb hâl ehline Tâ Muhammed’den beri sürülen erkân kimdedir