Niçün nûr-ı İlâhî’den kaçar îmâna gelmezsin Seninçün münzel olmuşdur niçün Kur’ân’a gelmezsin

1Niçün nûr-ı İlâhî’den kaçar îmâna gelmezsin Seninçün münzel olmuşdur niçün Kur’ân’a gelmezsin

2Semâvâtdan hitâb olan sana tevhîd değil midir Gözünden perdeyi kaldır niçün bürhâna gelmezsin

3Dedirtdiler dedim bunu inanırsan bu tevhîde Yürekde var iken derdin niçün dermâna gelmezsin

4Dokuz dürlü maraz sende gözün görmez kulûbünde Şifâlık bulmağa ana niçün Lokmân’a gelmezsin

5Velîlerin hakîkati dilindeki ma‘rifeti Senin nefsin eder ıslâh niçün fermâna gelmezsin

6Deme işitme çok olur murâd olan bu ma‘nâdır Geçip nâmûs u ârından niçün merdâne gelmezsin

7Nice ma‘mûr olasın sen çü sen fânî cihân fânî Ki kenzi bulmağa hâlen niçün vîrâna gelmezsin

8Bu can ma‘şûk sözün söyler kelâmın gayrısın bilmez Dükenmez hânı sultânın niçün ihsâna gelmezsin

9Yüzü güldür saçı sünbül anın ismi Muhammed’dir Cemâli bâğına anın niçün seyrâna gelmezsin

10Kemâlinden gelipdirsin gönülden ver salavâtı Açılmış verd-i handândır niçün reyhâna gelmezsin

11Misâlin bulmadım bunda tenin gibi lezîz helvâ Yiyenden tadını sorup niçün hayrâna gelmezsin

12Divânesin akıl yokdur kaçarsın nûr-ı tevhîdden Görüp mercân çıkarmağa niçün ummâna gelmezsin

13Sözü hatm-i kelâm etdim bu ma‘nâdan anlamazsın Tarîk-i müstakîm içre giden kerbâna gelmezsin

14Kelâmu’llâh yeter şâhid muvahhid âşıka zâhid Nebîlerden velîlere değin erkâna gelmezsin

15Vehâbî sırr ile söyler nihân ilmin sana her dem Haber sormağa vechinden niçün irfâna gelmezsin