tarikat.org1Hâlık’ı zikr eyle dâim tende cân mihmân iken Cân ile eyle ibâdet mürşidin Kur’ân iken
2Gel nasîhat dinle aşkdan gör ne der âşık sana Tâatin yok assısı işin gücün yalan iken
3Nice yakmaz tamunun odu seni yersin haram Gece gündüz içdiğin şol zehr ile katrân iken
4Hak Taâlâ hürmetinden kendini dûr eyleme Anda varıp olma hayvân bunda sen insân iken
5İmtihân içün havâle kıldı sana İblis’i Nicesi yatar uyursun düşmanın şeytân iken
6Yer ile gök dolusu kılsan ibâdet nef‘i ne Nefsini fehm eylemezsin câhil ü nâdân iken
7Âşık olmazsın gelip zâhid Hak’ın dîzârına Oturan gönlün evinde hûri vü gılmân iken
8Hasenât ahsen sıfatdır bürdedir dîzârına Gel fenâsın kıl taleb kim bunda ol âsân iken
9Sen hümâsın anlamazsın cism içinde kadrini Göremezsin dost yüzünü meskenin zindân iken
10Aç basîret gözünü sen göresin dîzârını Dört kitâbın ma‘nası cânında bak pinhân iken
11Dinle-gör aklın kabûl eylerse ger bu tevhidi Düşe gör kim katresinin ma‘nası ummân iken
12Aşk içinde ehl-i derdin nice derdi artmasın Bu kelâmı söyleyip söyletdiren Sübhân iken
13Aşk içinde Vâhibî sâfî mücerred âşık ol Zâyi etme ömrünü tevhîd sana bürhân iken
14Kul iken hür oldu cânım anladım mi‘râcımı Ârifin gönlü evinde sürülen erkân iken
15Sırr-ı hikmet evliyânın himmeti budur sana Şübhe etme Vâhibî bu derd sana dermân iken