Bu cânın düşdüğü vahdet bugün deryâ-yı ummândır Cemâl-i zât-ı Allâh’ın anınçün bana seyrândır

1Bu cânın düşdüğü vahdet bugün deryâ-yı ummândır Cemâl-i zât-ı Allâh’ın anınçün bana seyrândır

2Benim vuslatdaki zevkim akıllar eylemez idrâk Bu tevhîdin kemâlinden âşıklar mest ü hayrândır

3Nişânım bî-nişândandır anınçün adım insândır Uyan gafletden ey gâfil bu dil Mûsâ-yı umrândır

4Gözün aç cân ile dinle ilâhîden bu ilhâmdır Bu sırra kim ki “lâ” derse anın mürşidi şeytândır

5Bu zikrin ma‘nasın hâlen bilendir birleyen Hakk’ı Ki rûhum varının bâğı açılmış verd-i handândır

6Özümden zâhir olmuşdur ne gam dilimdeki esrâr Girersem cennetin zevki didârsız bana zindândır

7Erişdim “Kâbe kavseyn”e anınçün oldum “ev ednâ”60 Tarîk-i müstakîm içre refîkim sırr-ı Kur’ân’dır

8Müsecceddir cemî‘ a‘zam anınçün ehl-i tevhîdem Muhammed Mustafâ hakkı bu zikrin nûru bürhândır

9Dü âlemden mücerreddir Vehâb’ın rûhu rûhânî Hidâyet üzre vechinden bize bu lutf u ihsândır