Ezelden nârına aşkın ben yâne geldim cihân içre,

1Ezelden nârına aşkın ben yâne geldim cihân içre,

2Akıttım nîce dem yaşlar gözümden dolu kan içre.

3Hak ile bî-nişân iken kamû canlara cân iken,

4Düşürdü bî-mekân iken beni kevn ü mekân içre.

5Nice geldim, nice gittim nice doğdum, nice öldüm,

6Nice açtım, nice soldum, şol gül gibi cihân içre.

7Bulut olup göğe ağdım, matar olup yere yağdım,

8Güneş olup gehi doğdum zemîn u âsumân içre.

9Nebat olup nice devrân nice demde olup hayvân

10Geyürdü sûret-i insân bana devr-i zamân içre.

11Çü insân sûretin buldum Hakk’a hamd-ü senâ kıldım,

12Fenâ ender fenâ oldum bekâ-yi câvidân içre.

13Erişti ma’rifet nûru gönül oldu Hakk’ın Tûru,

14Niyâzi duydu çün sırrı gümân etti ayân içre.