Ârifin mutlak kelâmın duymaya irfân gerek,

1Ârifin mutlak kelâmın duymaya irfân gerek,

2Sırr-ı muğlâktır gönülde zevk ile vicdân gerek.

3Bir hazînedir tasavvuf mâlik olmaz her hasis,

4Bulmağa anı dü âlemde beğim sultan gerek.

5Dürr-i yektâ kânını âlemde bulmak isteyen,

6Bulmaz anı nehr içinde bahr-i bî-payân gerek.

7Ma’rifet dâ’vâsın eden müddeî bilmez mi kim,

8Dildeki dâ’vâya elde hüccet ü bürhân gerek.

9Ârif oldur başına halkı dirüp cem eylemez

10Gönlü cümle halk içinde hâk ile yeksân gerek.

11Kibr-ü ucbun illetinden kurtulup sağ olmağa,

12Bil tabîbin mâ’nâda Şeyhin senin Lokmân gerek.

13Şöhret ıssı ma’rifet kenzini bulmaktır muhal,

14Varlığın şehri senin baştan başa virân gerek.

15Ölmeden evvel ölüp kabre girip haşre çıkıp,

16"Mâlik-ül mülk"-ün şuhûdunda gönül hayran gerek.

17Nefsi tamûsun sırât-ı şer’i ile bunda geçüp,

18Kalp evi hep hûr-û gilmân cennet-i rıdvân gerek.

19Söyleyip işittiği dahî görüp zikrettiği,

20Üstüvâ-i arş-ı sırda Hazret-i Rahmân gerek.

21Her kaçan tûtîlere feth-i dehân ettik ol,

22Lezzetinden tûtîler sözlerine nedmân gerek.

23Gâh hamûş olup dilinden kimse almaya cevab,

24Gâh açılıp şâd olup güller gibi handân gerek.

25Gâhi üns, gâh heybet gâh rü’yet gâh cemal,

26Gâh sahv-ü gâhi mahv gâh vücûd gâh cân gerek.

27Terk edip cümle kuyûdâtı erişe sırfa ol,

28Sırfa erse bir gönül içi anın ummân gerek.

29Aradan iskât edip cümle izâfâtı hemân,

30Hakk vücûdu âşikâre gayrisi pinhân gerek.

31Çünkü ârîdir izâfattan vücûdu dilberin,

32Zevk-i küllî isteyen âşık dahi üryân gerek.

33Mısrıyâ terk-i izâfât etmeğe lâyık olan,

34Kümmel-i insân içinde bindebir insân gerek.