Erenler bir denizdür ‘âşık gerek talası Bahrî gerek denizden girüp gevher alası

1Erenler bir denizdür ‘âşık gerek talası Bahrî gerek denizden girüp gevher alası

2Gine biz bahrî olduk denizden gevher alduk Sarrâf gerek gevherün kıymetini bilesi

3Yüri var epsem ol a ne simsârlık satarsın ‘Alî gibi er gerek iş bu sırra eresi

4Muhammed Hakk'ı bildi Hakk'ı kendüde gördi Cümle yirde Hak hâzır göz gerekdür göresi

5Dile rızkını Hak'dan nahnu kesemnâ pinhân Nefsin bilmiş er gerek göz hicâbın silesi

6Didüm iş bu nefesi ‘âşıklar hükmiyile Bâhıllıksuz er gerek bir karâra durası

7‘Âlimler kitâb düzer karayı aka yazar Gönüllerde yazılur bu kitâbun sûresi

8Yüri hey sûfî zerrâk ne sâlûslık satarsın Hak'dan artuk kim ola kula dilek viresi

9Hak duragı gönülde âyâtı var Kur'ân'da ‘Arş'dan yukarı cânda ‘ışk burcınun kulesi

10Şöyle delü olmışam bilmezin dünden güni Yüregümde işledi ‘ışk okınun yaresi

11Gel imdi miskîn Yûnus tut erenler etegin Cümlesi miskînlikde yoklugımış çâresi