Biz bizi bilmezidük bizi kendüden eyledi Âşkâre kıldı bizi kendüy pinhân eyledi

1Biz bizi bilmezidük bizi kendüden eyledi Âşkâre kıldı bizi kendüy pinhân eyledi

2Biz bile pinhânidük gayr-ı sen ü ben idük Mutlak bî-gümânidük hem bî-gümân eyledi

3Topragı kadarladı sûreti hat bagladı Durgurdı dört âleti adın insân eyledi

4Çün yaratdı Âdem'i bileyidük biz kamu Bu kamu hâs u ‘âmı bir ma‘denden eyledi

5Asl-ı ma‘dendeyidük kaygusuz ganîyidük Ol bî-nişân cihânda şöyle revân eyledi

6Görgil Çalap fazlını yıkmaz ‘âsî gönlüni Bin bin kerem lutfıla ol tercemân eyledi

7Kamu bir yire gider kimse niçesi yiter İki birdür bir biter gör bir neden eyledi

8Çün nefs oldı havâle dagılduk degme yola Tatlu oldı nevâle ol sen ü ben eyledi

9Ne sen ü ben ne fülân ne dutarısa yalan Dünyâ çirkine kalan işün gümân eyledi

10Âdem'den buna degin ne eli var ne yegin Geymegile yimegi bir dâneden eyledi

11Elest'de bileyidük göz açduk “Belî” didük Yûnus'ıla gayrını kamu birden eyledi