tarikat.org1Çalap Âdem cismini toprakdan var eyledi Şeytân geldi Âdem'e tapmaga ‘âr eyledi
2Eydür ben oddan nûrdan ol bir avuç toprakdan Bilmedi kim Âdem'ün için gevher eyledi
3Zâhir gördi Âdem'ün bâtınına bakmadı Bilmedi kim Âdem'i halka server eyledi
4Kırk yıl kalıbı yatdı adı ‘âlemi tutdı Gör şeytânı bugzından ne fitneler eyledi
5Âdem toprak yatmışdı at âlemi dutmışdı Fikrine bak İblîs'ün ya'ni hüner eyledi
6Ol yüriyen atları sürdi Âdem üstine Âdem'e mekr irgürüp ya'ni zafer eyledi
7Âdem'ün göbeginden Çalap yaratdı anı Vaff diyüp turı geldi anlar güzer eyledi
8Çün gitdi Âdem ‘ahdi yetdi Mûsâ'nın vaktı İblîs'e işbu işler yavlak eser eyledi
9Mûsâ gönüldi Tûr'a Hak'la münâcât kıla Gördi kim bir su akar Mûsâ nazar eyledi
10Mûsâ eydür göreyin bu su ne yirden gelür Ger böyle akarısa zîr ü zeber eyledi
11İlerü vardı Mûsâ la‘în oturmış aglar Gözinün yaşıyımış ol su bınar eyledi
12Mûsâ sordı la‘îne agladugun nedendür N'ideyim aglamadın dir işüm zâr eyledi
13Mukarrrebdüm Mûsâ ben ol Hakk'un dergâhında Götürdi urdı yire işümi şer eyledi
14Sen bilmez misin Mûsâ ben neden ayrıldugum Şunlar ögüme düşdi beni humâr eyledi
15Vargıl digil yâ Mûsâ rahmet eylesün bana Tevbe kılup işine hoş istigfâr eyledi
16Mûsâ irdi hâcete Hakk'ıla münâcâta Unutdı emâneti söz muhtasâr eyledi
17Hak Mûsâ'ya eyitdi unutdun emâneti Ol nidâya cânını Mûsâ nisâr eyledi
18Vargıl digil yâ Mûsâ rahmet ideyim ana Secde itsün Âdem'e çün istigfâr eyledi
19Mûsâ geldi la‘îne didi Hakk'un buyrugın Secdeyi işidicek döndi inkâr eyledi
20Ben andan umarıdum derdüme dermân kıla Dahı arturdı derdüm ya‘ni tîmâr eyledi
21Ben eger tapsam ana ol vaktin taparıdum Şimdi hod toprak olup zîr ü zeber eyledi
22Âdem İblîs kim ola işi işleden Çalap Ayı güni yaradup leyl ü nehâr eyledi
23Ma‘nî nedür İblîsden câhillik kamu bizden Ne duydun iş bu sözden sırrı esrâr eyledi
24Çalap eydür şol kula ‘inâyet benden ola Ne şeytân azdurısar ne kimse kâr eyledi
25Altı bin yidi yüzi yıldan geçen Âdem'i Dile getürdi Yûnus söz muhtasâr eyledi