Lâ-şerîkden okursın sonra şerîk katarsın Bire iki dimegi kimden fetvâ dutarsın

1Lâ-şerîkden okursın sonra şerîk katarsın Bire iki dimegi kimden fetvâ dutarsın

2Dîn ü îmân bünyâdı togrulıkla gerçeklik Ol tamâm olmayıcak neyile dîn çatarsın

3Çün Kur‘ân gökden indi anı Allâh buyurdı Andan haber virsene hâ kitâbdan ötersin

4Okursın tasnîf kitâb niçe binâ vü i‘râb Havf ü recâ sende yok eyle ki bir Tatar'sın

5‘İlm okımak bilmeklik kendözini bilmekdür Pes kendözün bilmezsen bir hayvândan betersin

6‘İlm okımak ma‘nîsi ‘ibret anlamagiçün Çün ‘ibretden degülsin görmedin taş atarsın

7On iki bin hadîsi cem‘ eyledi Mustafâ Anı işitdün meger şerh ile söz satarsın

8Kılursın riyâ namâz yazugun çok hayrun az Dinle neye varur söz Cehennem'de yatarsın

9Halkı fetvâ virürsin yâ sen niçün dutmazsın ‘İlmün var ‘amelün yok hâ günâha batarsın

10Sen fakîhsün ben fakîr sana tanumuz yokdur İhlâsıla gelürsen bizden nesne ütersin

11Bu düzilen tertîbi ayruksıdı mı dirsin Başaramazsın hâce endîşeden yitersin

12Yûnus miskîn bu sözi ‘ışk ‘âleminden söyler Dime bilmedin ana kendözünden katarsın