Dört kitâbın evveli gönlümde bismillâhdır Besmele bâbındaki nokta ayân Allâh’dır

1Dört kitâbın evveli gönlümde bismillâhdır Besmele bâbındaki nokta ayân Allâh’dır

2Okumak yazmak budur ayne’l-yakîn hakka’l-yakîn Dört kitâbın tefsiri ayn-ı kelâmu’llâhdır

3“Lâ” demezsen tevhide fehm eyledin ahvâlimi Her nefesde tevhidim irfân-ı zâtu’llâhdır

4Söyledim şerh eyledim verdim haber zâhid sana Âşıkın seyr etdiği nûr-ı cemâlu’llâhdır

5Dört kitâbı tefsir etdim ma‘nası birdir hemân Anladınsa pes yeter tevhid azîmu’llâhdır

6Cân içinde cânımın zevki budur hakka’l-yakîn Âşıka lâzım olan maksûd hemân Allâh’dır

7Zât-ı Hak’dan gönlüme in‘âmı dinle cân ile Mü’minem sadrımdaki sâfî imânu’llâhdır

8“Lâm-elif lâ-raybe”nin vechinden aldım dersimi30 Söyleyip söyletdiren fehm eyledim Allâh’dır

9Gönlüm âbâd eylemez ol zâhidin efsânesi Mü’mine lâzım olan zikr-i hafiyyu’llâhdır

10Zikr-i Hû’nun ma‘nası ne aynıdır ne gayrıdır Cânıma ihsân olan aşkdan selâmu’llâhdır

11Kâl ü kıyl lâzım değildir perde yokdur arada Kâr u kesbim her nefes vechinde seyru’llâhdır

12Câhil ü nâdân sanıp ta‘n eyleme zâhid bize Düşdüğü bu zümrenin bilgil ki ilmu’llâhdır

13Âşık ile ma‘şukun sırrındaki ma‘nâya bak Mü’minin gönlü evi arş-ı azîmu’llâhdır

14Gönlüme Hak’dan gelen ma‘nâyı dinle cân ile Ârifin nutkundaki esmâ-yı sıfâtu’llâhdır

15Yürü var inkârı ko ikrâra gel Allâh içün Özünü fehm eyleyen Âdem safiyyu’llâhdır

16Hoş nebîdir Hak katında bir sözü olmaz iki Âlemi gark eyleyen Nûh-ı neciyyu’llâhdır

17Dilime verdi kerâmet söyledim bu tevhidi Demiri mum eden Dâvud halîfetu’llâhdır

18Devler ü yeller kamu emrinde fermândır anın Hâtem-i mühr-i Süleymân sırr-ı emînu’llâhdır

19Dört kitâbın ma‘nası muhabbet bize bürhândır Ka‘be’yi bünyâd eyleyen İbrâhim halîlu’llâhdır

20Hikmet ile dilime ahsen gelen tevhîdi gör Derdini dermân bilen Eyyüb nebiyyu’llâhdır

21Ârifin tevhîdini bir bir sana etdim beyân Tûr dağında söyleşen Mûsâ kelîmu’llâhdır

22Nâzır ol ihyâ edipdir gönlümü tevhîd-i zât Mürdeler ihyâ eden Îsâ-yı rûhu’llâhdır

23Zâhir oldu dilime nûr-ı nübüvvet himmeti Dü cihânın şemsi ol nûr-ı Habîbu’llâhdır

24Hakk’a ma‘lûm bilmesi yokdur nihâyet fazlına Ol şefâat sâhibi nûr-ı şefîu’llâhdır

25Gelmemişdir gelmeyiser bir dahi akrânı yok Hazret-i Zehrâ’yı gör ne sâlihatu’llâhdır

26Hak Taâlâ hûb yaratmış dahi doymaz dostuna Hazret-i Hamza’yı gör sâhib-kırânu’llâhdır

27Bin salavât rûhuna yokdur nihâyet fazlına Ammisi Peygamber’in Abbâs azîzu’llâhdır

28Tâlib-i fakr u fenâ içinde bir dîvâneyem Evliyâ ser-çeşmesi Alî veliyyu’llâhdır

29Kalbimin şükrü budur ayne’l-yakîn hakka’l-yakîn Bizi irşâd eyleyen sırr-ı Aliyyu’llâhdır

30Zübde-i ervâh-ı âlem diyeyin kimdir sana Ol Hüseyn ile Hasan şâh-ı şehîdu’llâhdır

31Zikr ile fikr eyleriz biz anların ahvâlini Dilime ahsen gelen Zeyn-i ibâdu’llâhdır

32Bunların rûhun sorarsan cedd-i a‘lâsındadır Gör Muhammed Bâkır’ı ma‘nâda sırru’llâhdır

33Âcizem hem kâsıram yâ nice şerh etsin dilim Söylediğim Mûsa-yı Kâzım veliyyu’llâhdır

34Ehl-i Hak’dır “lâ” deme şekk ü gümânım yok benim Cân gözüyle gör Alî Mûsâ rızâu’llâhdır

35Vâcib oldu demesi biz bunları medh eyleriz Emr-i Hakk’a baş eğen Ca‘fer Sadîku’llâhdır

36Hikmet ile söylerim bu tevhidin ma‘nâsını Vâsıl olan Hazret’e şâh-ı Takıyyu’llâhdır

37Âlem-i gayb ü şehâdetden getirdim nüshasın Keşf-i esrâr etdiğim imâm Nakıyyu’llâhdır

38Bunların biz cümlesin derc eyledik verdik haber Gel gör imdi ol Hasan kim Askeriyyu’llâhdır

39Derdmend miskîn Vehâbî sözünü hatm eyledi Sırr içinde dediğim Mehdî zamânu’llâhdır