Yâ İlâhî kıl inâyet senden ihsân isteriz Zâtını seyr etmeğe tevhîd-i bürhân isteriz

1Yâ İlâhî kıl inâyet senden ihsân isteriz Zâtını seyr etmeğe tevhîd-i bürhân isteriz

2Zikr ile fikr etmeğe cânıma ihsân et benim Aklımız ancak yeter vicdân-ı irfân isteriz

3Âşıkın senden ricâsın sen bilirsin yâ İlâh Kokusu aşkdan durur verd ile handân isteriz

4Maksudum senden budur ayne’l-yakîn hakka’l-yakîn Âteş-i aşk içre biz yanmağa külhân isteriz

5Mustafâ’nın hürmetinden bizi mahrûm eyleme Şübhemiz yokdur bizim sıdk ile îmân isteriz

6Cennetü’l-firdevs-i a‘lâ zâhidin maksûdudur Gayrısı lâzım değil biz âb-ı hayvân isteriz

7Aşk-ı sâfînin cemâlinden sana budur hitâb Âşıkız hem sâdıkız biz sâfi Sübhân isteriz

8Kalbimin âyînesinden bize ilhâm eyledin Çelmeğe kudret topun bir ulu meydân isteriz

9Karga kuzgun değiliz lakır lukur eyleyevüz Bülbülüz biz konmağa seyr-i gülistân isteriz

10Müşterî cândır hemân bu tevhidin ma‘nâsına Gevherin sarrâfıyız la‘l-i Bedahşân isteriz

11Hâlimiz arz eyledik yâ Rab senin dîzârına Söylemek lâzım değil deryâ-yı ummân isteriz

12Mi‘demiz almaz bizim tarhana bulgur çok yemek Âteş-i aşk ile pişmiş tâze biryân isteriz

13Hamdülillâh çok şükür dergâhına geldik bugün Zâtının envârını bu cânda pinhân isteriz

14Maksudun her ne ise istendi verdim ben sana İblis’i habs etmeğe mühr-i Süleymân isteriz

15Vechine mazhar düşelden cânımız söyler bunu Gizli değil gün gibi biz sâfi ayân isteriz

16Rûhumuz hakka’l-yakîn sâfî mücerred kılmağa Gayrının efkârını çelmeğe çevgân isteriz

17Nâkıs-ı âkil değildir Vâhibî var zâhidâ Hûri vü gılmân sana biz nûr-ı Yezdân isteriz

18Aklım ile nefsimi kül et vücûdum kalmasın Biz Muhammed Mustafâ nûruyla yeksân isteriz

19Dâd-ı Hak’sın şübhesiz Miskîn Vehâb’ın cânına Mahv ü gark olmaklığa emrinde fermân isteriz