Gel imdi Hâlık’ı zikr et eğer insân isen insân Gel imdi Hâlık’ı fikr et eğer insân isen insân

1Gel imdi Hâlık’ı zikr et eğer insân isen insân Gel imdi Hâlık’ı fikr et eğer insân isen insân

2Şehâdet etdi hakkında sen ol nüsha-i kübrâsın Haber ver nûr-ı a‘lâdan eğer insân isen insân

3Cemâlinle münevverdir kamu âlem senin ey yâr Cemâlinden haber ver sen eğer insân isen insân

4Memâtım yok hayâtımdır anın zâtındaki ihlâs Onat fehm eyle tevhîdi eğer insân isen insân

5Ne âlemdir bu âlem kim sana zâhir olur hâlen Bu sırdan gel haber ver sen eğer insân isen insân

6Bu tevhîdin sıfâtıdır senin vechin gözün aç sen İşit imdi bu tevhîdi eğer insân isen insân

7Bu ma‘nâ-yı muammâyı akıllar eylemez idrâk Düşersin nûr-ı ummâna eğer insân isen insân

8Göresin aslını ayân bu mir’ât-ı mücellâdan İnâd etme bu ma‘nâya eğer insân isen insân

9Görünmez gözüne ma‘nâ özün zulmetdedir zâhid Gözün aç cân ile dinle eğer insân isen insân

10Murâdın cennet-i me’vâ nic’anlarsın bu ma‘nâyı Özün fehm eyle ko anı eğer insân isen insân

11Dedirtdiler dedim sana cemâlinin kemâlinden Şarâb-ı şevki nûş eyle eğer insân isen insân

12Diyen kim dediren kimdir nic’anlarsın haber ver sen O sırdan hiç haber yokdur eğer insân isen insân

13“Ene’l-Hak”dan dedi Mansûr anınçün düşdü gavgâya Bu sırrı sen nihân eyle eğer insân isen insân

14Buyımış usûl-i erkân edesin da’vâ-yı vicdân Buyımış zübde-i irfân eğer insân isen insân

15Muvahhid mü’minem hâlen kelâmu’llâh yeter şâhid Sıfât-ı zâtını yâd et eğer insân isen insân

16Nasîhatdir sana cândan işidirsen bu ilhâmı Nişânın bî-nişân eyle eğer insân isen insân

17Özün hâk eyle pâk olsun diye söyler sana Vâhib Alasın dersini aşkdan eğer insân isen insân