Bedenden geçmişem ben câna geldim Kemâl-i sırr ile insâna geldim

1Bedenden geçmişem ben câna geldim Kemâl-i sırr ile insâna geldim

2Bi-hamdi’llâh bugün buldum makâmım Soruban ma‘nasın Kur’ân’a geldim

3Dile gelmez desem yârin visâlin Gönül tahtındaki sultâna geldim

4Cemâl-i vaslının buldum visâlin İçinde katrenin ummâna geldim

5Görünmez sîreti beşer gözüyle Fenâ mülkündeki vîrâna geldim

6İnanırsan sana verem cevâbı Gönül bâğındaki seyrâna geldim

7Bu imiş âşıka ma‘şûk nişânı Ne gam şimden geri ayâna geldim

8Kılaldan tâati hakka’l-yakînden Anınçün defter-i dîvâna geldim

9Muhabbet ma‘nâsı câna düşelden Başım top eyleyip meydâna geldim

10Bu cismim cehlini fehm etdi cânım Anı yakmaklığa külhâna geldim

11Eğer bildin ise remzin rumûzun Hak’ın lutfundaki ihsâna geldim

12Hak’ın zikri hidâyetdir dilime Ne gam şimden geri handâna geldim

13Görürsen Vâhibî fi‘lini aşkdan Cemâl-i şevkine devrâna geldim

14Erişdi cânıma sırdan hidâyet Yanılmadım yolum Rahmân’a geldim

15Benim keyfiyyet-i hâlim sorarsan Şarâb-ı şevk ile mestâne geldim

16Cihânı seyr edip geldim gönülden Bu aşk içindeki destâna geldim

17Sana söyler hitâb eyler Vehâbî Bu halka rahm eden Rahmân’a geldim