Bahrî idim hakîkatin ummânına dalıp geldim Nûr-ı bâkî âleminin sırrın andan alıp geldim

1Bahrî idim hakîkatin ummânına dalıp geldim Nûr-ı bâkî âleminin sırrın andan alıp geldim

2Âşıkdaki ma‘şûk sırrın diyem sana dinlendi gör Mustafâ’yla bir kandîlde yedi bin yıl durup geldim

3Aşk pişirip perverd’etdi muhabbeti envârıyla Ol kandîlin iç yüzünden dış yüzüne sızıp geldim

4Bu hâle sen müştâk isen tevhîd yeter bürhân sana Dost elinden aşk câmını sâfî nûrdan içip geldim

5Dört kitâba sıfât olan Muhammed’in vechi imiş Ma‘nâ yüzünden ezelî dersim andan alıp geldim

6Ârız değildir kadîmdir bu tevhîdin sırrı cânda Cümle şübhem Peygamber’e işde şimdi sorup geldim

7Gönlümdekin bildirdiler mümkinâta gönderdiler Fâtiha’yı gösterdiler ol sırra ben düşüp geldim

8Sırrın içindeki sırdan haber versem anlar mısın Yedi bâtın içeriden olan yola düşüp geldim

9Aklım ile cismim tenim aşkın odu benim yakdı Yer yüzünden gök yüzüne külümü savurup geldim

10Azrâil’in gelip benden istediği ne ma‘nâdır Anda varıp emâneti ben ıssına verip geldim

11Hakk’ın lutf u inâyeti dilimde bu söylediğim Enbiyânın evliyânın menziline erip geldim

12Dört kitâbın hakîkati şâhid yeter hemân bana Evvel âhir olacağı anda bunda bilip geldim

13Kur’ân ehli olan bilir bu tevhîdin ma‘nâsını Hak saklasın unutmakdan bir ahdimi görüp geldim

14Yaratmak diledi yokdan benim cismim tenim Allah Toprağıma yâ Hayy dedi ağsıruban sorup geldim

15Düş ilinde gezer iken bulduğumdur söylediğim Âdem oldum buğday yedim cennetden sürülüp geldim

16Sır ilinde âh ederdim ol dağlarda vâh ederdim Nice yıllar göz yaşını yer yüzüne döküp geldim

17Sâhib-kıran Hamza oldum cümle sırrı bende buldum Kâf dağının içindeki ol devleri kırıp geldim

18Hakk’ın fazl ü inâyeti erdi câna gör n’eyledi Karanlıkdan aydınlığa hamdülil’lâh çıkıp geldim

19İlmin sıfâtı ma‘nâsı vicdânımda zâhir oldu Anın kudreti elini sağ elime alıp geldim

20Âdem’e “kerremnâ” dedi bu ma‘nâda mevcûddur ol70 “Lâ” demedim ol tevhîde emre sücûd edip geldim

21İbtidâsı intihâsı âsiliğin işde budur “Tahte’s-serâ”da İblis’in binâsını yıkıp geldim71

22Âlem-i ma‘nâ yüzünün ma‘nâsını anlar mısın “Urvetü’l-vüskâ” ipini gerdânıma takıp geldim72

23Mü’minlere şâhid budur ayne’l-yakîn hakka’l-yakîn Saâdet tâcını nurdan Muhammed’den giyip geldim

24Zikrim ile fikr etdiğim gizli idi oldu ayân Gam yemezin şimden geri îmânımı bulup geldim

25Dünyâ ahret istemezem muhabbetin tahtındayam Cânım başım bu meydâna ben aşk içün verip geldim

26“Lâ” demezsen bu tevhîde mi‘râcımı diyem sana Muhammed’in hakkı içün Sübhân’ıma bakıp geldim

27İlmu’llâha mazhar düşen ârif bilir bu tevhîdi Kalb evinde Hannâs’ının vesvâsını silip geldim

28Küfrüm bildim tevbe etdim kabûl etdi redd etmedi Sır zikrinin nûru ile âşıklara duyrup geldim

29Bulut oldum göğe ağdım yağmur oldum yere yağdım Vücûdumda âsî olanı sulara boğdurup geldim

30Hak zikrinin kemâlidir gönlümdeki ma‘nâ benim Halâyıkdan ahvâlini ne idiğin bilip geldim

31Aklım değil cismim değil rûhum bunu diyen sana Ma‘nâda Süleymân oldum cümleye hükm edip geldim

32Zâhir olan Zekeriyyâ bâtınımda oldu bana Ol dost içün düşmanıma depemi dildirip geldim

33Nazar etdim halk gönlüne hayâtı yok memât gördüm Îsâ geldi nefes verdi ölüler dirgörüp geldim

34Evliyânın sakkâsıyın kandırırın susuzları Aşk nehrinin bunarından kırbamı doldurup geldim

35Bu dilimin söylediği erenlerin menzilidir Arş ü kürsî dokuz göğü misâfirin gezip geldim

36İbâdetin ma‘nâsıdır benim sana söylediğim Âhiretin varlığını cevhere değişip geldim

37Muhammed mi‘râcda iken Vâhib Ümmî garkda idi Anın izinin tozuna ben yüzümü sürüp geldim