Terk ü tecrîd âşıkam seyrân diler gönlüm benim İstemez ma‘mûru hiç vîrân diler gönlüm benim

1Terk ü tecrîd âşıkam seyrân diler gönlüm benim İstemez ma‘mûru hiç vîrân diler gönlüm benim

2Dü cihandan zerrece yokdur murâdım Hak bilir Nefsimi fehm etmeğe irfân diler gönlüm benim

3Yetme mi şâhid benim dilimdeki tevhîd-i zât Düşüben gark olmağa ummân diler gönlüm benim

4Vechinin ma‘mûruyuz eşgâli n’etsin cânımız Ehline ma‘lûm bu söz sultân diler gönlüm benim

5İlm-i hikmetden neler söyler bu cân dinlendi gör Yanmağa dîzâr içün külhân diler gönlüm benim

6Hazm olunmaz aşkı deryâ-yı muhîtin mevcidir Bülbülem gülde ötem handân diler gönlüm benim

7On sekiz bin âlemi gezdim kanâat gelmedi Zâtının envârını pinhân diler gönlüm benim

8Dört kitâbın hakkı-çün tevhid hidâyetdir bize Ma‘nasın fehm etmeğe Kur’ân diler gönlüm benim

9Gönlüm almaz zâhidâ hiç gayrısını ni‘metin Zevk içün hem şevk içün devrân diler gönlüm benim

10Yâ İlâhî izzetin-çün bildiğim budur benim Cânımı dîzâr içün kurbân diler gönlüm benim

11Sağ değil dîzâr içün miskin Vehâbî hastadır Derdine dermân içün Lokmân diler gönlüm benim