Hamdülillâh çok şükür kim bizi insân eyledin Lutfunu kıldın inâyet zâtın ihsân eyledin

1Hamdülillâh çok şükür kim bizi insân eyledin Lutfunu kıldın inâyet zâtın ihsân eyledin

2“Kâf” ile “nûn”dan yaratdı cismimi ey pâk-i zât Tevhidin ma‘nâsını sînemde îmân eyledin

3On sekiz bin âlemi levhimde yazmışsın benim Ma‘nasın fehm etmeğe tevhîdi bürhân eyledin

4İnşâallah gam yemen kıldın inâyet cânıma Katre iken gönlümü deryâ-yı ummân eyledin

5Cümle esmâ vü sıfâtın Hazret-i Âdem’dedir Kim ana baş eğmediyse anı şeytân eyledin

6Hoş adüvdür kim anın nefsimde buldum sûretin Sihrini def‘ etmeğe tevhîdi dermân eyledin

7Aşk-ı deryâ-yı muhîtden nutkum etdin âşikâr Cânımı bu şevk ile emrine fermân eyledin

8İnşâallah gam yemen sensin bize hem-râz olan Tevhidin bâzârını gönlümde dîvân eyledin

9Söyle dedin söyledim ahkâm-ı aşkın remzini Zikrimin ma‘nâsını âyât-ı Kur’ân eyledin

10Hikmet ile cân ilinden cânıma etdin nidâ Tevhidin ma‘nâsına sen cânı hayrân eyledin

11Yâ ilâhî ben kulunu söyleden sensin hemân Tevhidin esrârını âleme destân eyledin

12Aşk hayâtı câmını Mansûr’a sundun ol zamân Sen anın gönlü evini verd-i handân eyledin

13Maksûdu sensin anın gayrısını ol istemez Âşıka ma‘nâda sen dünyâyı zindân eyledin

14Cânıma etdin hidâyet dilime esrâr-ı aşk Evliyânın nutkunu sen âb-ı hayvân eyledin

15Nice vermez gönlünü miskîn Vehâbî vechine On sekiz bin âlem içre anı sultân eyledin

16Ehl içinde âşıkın ehliyyeti bir noktadır Pâdişâhım zâtını sen anda pinhân eyledin

17Ârife hakka’l-yakîn Hû’dur cemâlin vuslatı Hürmetine tevhidin gönlün gülistân eyledin

18Cism içinde şevk ile verdin kerâmet cânıma Sana hem-râz olmağa nutkumu irfân eyledin

19Zikr-i adle mazhar etdin anların ervâhını Gussa vü gamdan azâd edip Süleymân eyledin

20Nicesi zikr etmesin âşık cemâlin vasfını Zâtının envârını gün gibi ayân eyledin

21Ben kimem vechin senin yâd eyleyem ey pâdişah Hürmetine Vâhib’i sırrında pinhân eyledin