Mazhar-ı âyât-ı Kur’ân olduğum mudur suçum Ârif-i esmâ-i Rahmân olduğum mudur suçum

1Mazhar-ı âyât-ı Kur’ân olduğum mudur suçum Ârif-i esmâ-i Rahmân olduğum mudur suçum

2Zikr-i kalbimdir benim zâtı sıfâtı bildiren Bilmezem aşk ile ayân olduğum mudur suçum

3Hızr elinden içdi cân âb-ı hayâtın cür‘asın Ben anın fazlından insân olduğum mudur suçum

4Kâlimi hâl eyleyen deryâ-yı vahdet lâ-mekân Âlem-i hikmetle üryân olduğum mudur suçum

5Hamdülillâh çok şükür aslında pâkdır gevherim Kesret-i ulvîye perrân olduğum mudur suçum

6Derdime dermân içün tevhîde ikrâr eyledim Bu fenâ mülkünde destân olduğum mudur suçum

7Evvel ü âhir hüve’l-Vâhid ihlâs ehliyiz Âteş-i aşk içre biryân olduğum mudur suçum

8Cân gözüyle gördüler dîvâneler vechin anın Gün yüzü şem‘ine üryân olduğum mudur suçum

9İzzet-i Hak’dan âhar bir nesneye baş eğmedim Enbiyâ râhında kurbân olduğum mudur suçum

10Evliyânın meclisinde sînemi çâk eyledim Bilmezem hâk ile yeksân olduğum mudur suçum

11Havf u recâdan geçirdi cânımızı ism-i zât Saltanat tahtında sultân olduğum mudur suçum

12Rûh dilinden anladım bu söz Hakk’ındır şübhe yok Vahdeti nûrunda pinhân olduğum mudur suçum

13“Ve’d-duhâ ve’l-leyli”nin fehm eyledim ben nediğin Âlem-i ma‘nâda ummân olduğum mudur suçum

14Ehl olanlar anladı ahdimde noksân etmedim Vâhid’in sırrında hayrân olduğum mudur suçum

15Kendi fi‘lin bilmeyendir Vâhib’e ta‘n eyleyen Ahmed’in şevkinde nâlân olduğum mudur suçum