tarikat.org1Serây-i din esâsıdır şerîat
2Tarîk-i Hak hedâsıdır şerîat
3Budur evvel kapu dergâh-ı Hakk’a
4Ki yolun ibtidâsıdır şerîat
5Dahi bununla hatm olur bu yollar
6Bu râhın intihâsıdır şerîat
7Sırat-ı müstakîm’e davet eden
8Münâdîler nidâsıdır şerîat.
9Şeriat enbiyânın sünnetidir,
10Kamûnun ihtidâsıdır şerîat.
11Hüdâ’nın leyle-i Mi’râc içinde,
12Habîbine atâsıdır şerîat.
13Yirmiüç yıla dek Cebrâîlin
14Ana vahy-i Hüdâ’sıdır şerîat.
15Cihânda çoktur envâ-i ulûmun
16Kamûsunun hümasıdır şerîat
17Bu nefs-i kâfiri katletmek için
18Hakk’ın hükm-i kazâsıdır şerîat.
19Cihâd-ı ekber eden ehl-i diller,
20Kulûbunun safâsıdır şerîat.
21Tarîkat kârbânının önünce,
22Delil-ü muktedâsıdır şerîat.
23Hakîkat gerçi Sultanlıktır ammâ,
24Önünde anın livâsıdır şerîat.
25Şerîattan velî yâd olmaz asla,
26Velînin âşinâsıdır şerîat.
27Şerîatle durur arz-u semâvat
28Bu bünyânın binâsıdır şerîat.
29Ne bilsün şer’i pâki ehl-i ilhad
30Ol a’dânın a’dâsıdır şerîat.
31Hemen anlar da aklınca sanır kim
32Nizam için olasıdır şerîat.
33Sakın cânâ sakın anlara uyup
34Deme sen de n’olasıdır şerîat.
35Şerîatsız hakîkat oldu ilhad
36Hakîkat nûr ziyâsıdır şerîat.
37Ziyâ olmaz ise nûru da yok bil
38Hakîkatla kıyasıdır şerîat.
39Cihâna bir velî hiç gelmez illâ,
40Elinde anın âsâsıdır şerîat.
41Dahî başında tâcı, şâl-u kisve
42Hem eğninde abâsıdır şerîat.
43Hakîkat cânıdır ancak velînin,
44Canından mâadasıdır şerîat.
45Çıkıcak can beden öldüğü gibi
46Çıkıcak sır kalasıdır şerîat.
47Karâr etmez beden olmayıcak can
48Hakîkatın bekâsıdır şerîat.
49Hakîkat dilber-i ra’nâ gibidir
50Anın zerrîn libâsıdır şerîat.
51Sakın soyma anı na-mahrem içre
52Yüzün suyu hayâsıdır şerîat.
53Hakîkat arş-ı âlâdır muhakkak
54O arşın üstüvâsıdır şerîat.
55Cem-i Enbiyâ vü Evliyânın
56Niyâzî rehnümâsıdır şerîat.